Adam hukuklaryna gözegçilik edýän onlarça halkara gurama, şol sanda Human Rights Watch gurmasy bilelikdäki beýanat bilen çykyş edip, Gyrgyzystanyň häkimiýetlerini garaşsyz “Kloop” neşiriniň žurnalistlerine “köçe bidüzginçiligine açyk çagyryş etmek” boýunça bildirilen aýyplamalary bada-bat ýatyrmaga we metbugata garşy repressiýalary bes etmäge çagyrdy. Guramalar ýurduň az sanly garaşsyz metbugatlarynyň biri bolan bu neşire basyşyň gaýtadan başlanmagy bilen baglylykda çuňňur aladalanma bildirdiler.
Beýanatda 28-30-njy maý aralygynda Gyrgyzystanyň häkimiýetleriniň “Kloop” neşiriniň häzirki we öňki işgärleriniň birnäçesini saklandygy, öýlerinde gözleg geçirendigi we soraga çekendigi aýdylýar.
Beýanatyň awtorlary häkimiýetleriň, tankydy pikirleri basyp ýatyrmak üçin, Jenaýat kodeksiniň düzgünlerini giň manyda ulanýandygyny belleýärler. Howpsuzlyk gulluklarynyň rugsat bolmazdan öýleri dökmekden başlap, kameranyň öňünde ötünç soralýan wideolary ýazdyrmaga mejbur etmäge çenli görýän çäreleriniň, ýurduň içerki we halkara kanunçylygyna garşy gelýändigi aýdylýar. Adam hukuklaryny goraýjylar bu çäreleriň ýurtdaky garaşsyz žurnalistikany ýok etmek boýunça ýörite gurnalan kampaniýanyň bir bölegidigini nygtaýarlar.
Halkara guramalar diňe bir Gyrgyzystanyň häkimiýetlerini metbugata edýän basyşlaryny bes etmäge däl, eýsem Ýewropa Bileleşigini hem bu ýagdaý boýunça açyk we berk pozisiýa eýelemäge çagyrýarlar. Hukuk goraýjylar ÝB-niň pikir azatlygyny we žurnalistleriň hukuklaryny goramak üçin diplomatiki serişdelerini we goldaw mehanizmlerini işjeň ulanmalydygyny belleýärler.
Beýanatyň awtorlary “Žurnalistika jenaýat däl. ‘Kloop’ neşirine garşy basyşlar kanunyň hökmürowanlygyna we demokratiýa garşy gönükdirilen zarbadyr” diýip belleýärler.